Dat nieë Book

Otto Pötter hät all viëlle plattdüütske Böker schriewen, aower dat nieë Book is een gaas Besunneret. Up 203 Sieten hät de Autor van´t däglicke Liäwen vertallt. Dat Book is anners upstallt äs de anneren Pötter-Böker up Platt. Otto Pötter lait dao auk Infiäle to, de faken nich up düsse wies in een plattdüütskes Book staoht. Un to gaas viëlle daovan staoht päössige Riemsels un wat besunners schön is: To de Geschichten höert de „Kribbelkästkes“ (kiek nao unten), un dao-met sit´t in dat Book auk Musik in.

„Ick laot et laiwer sacht angaohn!“ Sau hait eene Üöwerschrift van de viëllen Geschichten, waomet de Autor düedlick maakt, dat he auk äs Siälendokter unnerwäggens is. Sau is et kien Wunner, dat sick van de viëllen Geschichten ne heele Masse, ick glaiw mäer äs de Halwscheid, üm de Sinn van´t Liäben dreiht.

In dat niie Book van Otto Pötter geiht et ok um Gesundheit, Krankheit und denn Daut

„Frei Di üöwert Liäben!“ Dat stait up Siete veerunniëgentig in´t Book un up düsse Aort geiht et fief Sieten nao vüörne hen wider, wu Pötter met siene Raotsliäge de positive plattdüütske Liäbensaort unner de Üöwerschrift stellt: „Et giff genoog üm nich to stüöhnen!“

Viëlle van de Geschichten hanneln van Gesundheit un auk daovan, dat de Mensk manks nich guëd in Schuss is. Otto Pötter bliew büs anlest up sien positiven Patt. Met „Aobendstund kömmt sachte“ gaiht et up de lessten Sieten los. Un he hät auk de Daut nich uutlaoten. „Wenn de kömmt is Sense!“ hait´t up Siete hunnertveerunniegentig!

Otto Pötter: „Heile, heile Hänsken!“ 203 Sieten met Beller un Teeknungen van Markus Pötter (Dresden) un viëlle Kribbelkästkes, Aschendorff-Verlag Münster, 18,00 Euro, ISBN 978-3-402-24655-9