HSV up dat Plüsch-Chässlong

Miene Beßmoder was ne kurante Meerske, sess Blagen har so graut trocken un in´t Huus har se dat Säggen. Dao moss sick auk Beßvader trügghaollen. He was in siene Wiärkstieë to Huus un in´n Gaoren – dat was sien Riek.

Ick was gäen bi de Äöllern van Moder to Besök, dat wüör ümmer wat Besunneret. „Junge, iät´t Di ´n Stücksken Koken, ick häb Di all wat dao hensatt´t“, was meerstendeels dat Iärste, dat ick to höeren krieg. „So´n Gedöns hät se met us nich makt“, sägg Moder faken

genog. Beßvader und Beßmoder wäör ´n guedde „christ-katholske Lüe“ äs man sägg. Dao verkläöre sick dat van söwst, da

t se nich blaoß Sunndags in de Kiärk göngen, de ´n paor Meter van iähr Huus weg stonn. Mien Onkel is Geistlick wuorn un in ´t Huus was auk de Pastoor faken to Gast. Un eenmaol, dao häb ick Beßmoder „Schande“ makt, äs se mi ächterhier saggt hät. Nummdags kreeg se Besök van´n Pastoor un dao har se de guedde Stuorw up Hauchglanz bracht. In de Stuorw stonn ´n Kanapee, so ´n Chässlong met grönen Plüsch. Dao konn man guedd drop schriewen, man moss den Plüsch tiëgen den Striek strieken.

Plattdütske Geschichten un Riemsels van Helmut Holz – Zeichnung Rottmann

Ick har an den Nummdag ´n unbewachten Augenslagg nutzt un was in de guedde Stuorw harin. Et was ümmer ´n grauten Spaß füör mi, up dat Chässlong Bookstaben to maolen. Ick was son Jungen van viellicht twiälf Jaohr un har grautet Interesse an Tietungen un daobie vüör allen an Sport. Un so mok ick mi de Tabelle van de Fotball-Bundesliga torecht, wo de HSV vüörne stonn.

Un daorüm schriew ick met graute Bookstaben „HSV“ up dat Plüsch-Chässlong. Blaoß häb ick vögiëtten, dat ächterhiër wiër weg to wisken. So stonn nummdags bi ´n Besök van ´n Pastoor „HSV“ op ´n Plüsch. De kiek sick dat an, wunnere sick un sägg to Beßmoder: „Wat is mi dat dann? Siet wann sind se füör Football?“ Beßmoder was ratz düörnanner, äs se dat luosen har, dan aower was iähr klaor, we „tostännig“ was. „Den aollen Schabbelünter van Jung“, sägg se met son´n Gneesen un daomet was de Sake füört Iärste afgedohn.

Äs de Pastoor aoms wiër weg was, raip se mi. „Jung, wi kass Du mi sowat andoon? Sall de Pastoor denken, wi här´n nicks Anneret in´n Kopp äs Football? Wann Du „IHS“ (Jesus, Heiland, Seligmacher) dropschriëwen häes, dat wäör dat doch wennigstens wat Katholskes wiärst.

De Geschichte is ut dat Book “Äs dat Ampellecht op Raut stonn” van Helmut Holz. Nu dat Book bi us in’nen Westfalium-shop bestöllen