De Müllabfuhr is vandage ´n ganz grootet Thema, un dat nich blaoß, wenn de Städte un eegenstännige Düörpkes un Gemeenen de Gebühren hauchsetten wellt. Wi häwwt an Huus de raue Tonn füör den Restmüll, de giälle füör Plastik un so ´n Tüüchs van de Verpackungen un de blaue füör Popier. Un et giww auk de grööne füör natürlikken Uutschuss, aowwer de häwwt wi nich, willdat wi ächtert Huus ´n Komposthaupen häwwt, wo all dat Grööntüüchs, de Koffeeprütt aorre sölwige Saken verrott`t un to guedde Äer (Erde) wett.
De Müllabfuhr giwwt in de Städte all siet vielle Jaohr, aowwer in usse Düörpken, dat so üm de fief Kilometer “ächtern Moon” (Mond) lagg, kamm dat ´n paar Jäöhrkes läter. Un daomols was “Plastik” binoh ´n Fremdwaort. Inkoopt wuer met Taschken un Büdels, in den “Tante-Emma-Laden” van Moder gaww´t All´s to koopen, aowwer nix uut Plastik.
Fröher was ook nich allet schlecht – Plattdütske Geschichten un Riemsels van Helmut Holz
So häwwt wi daomols den Müll sölwst “entsuorgt”. Dat saog dann so uut: De Asche, de bi´t stuoken van´n Backuoben elken Dag tosammenkamm, de wuer ächtert Huus affkippt, tüschken ´ne hauge Müer un den grauten Schuottsteen van´n Bachuoben. Dat Popier un all de brennbaren Saken van´n Pappkarton bis hen to dat Holt, dat Vader nich mehr bruuken konn, wuer op de glieke Stiee üöwer de Bachuoben-Asche küert, dao konnt der Lüe Füerkes beuten, äs se dao Spaß an har´n.
Un eenmaol in´t Jaohr kamm usse Naohber, de ´n grauten Buernhof har, met´t Piärd un siene Stüörtkarr´ an hahl sick den ganzen Kraom aff. He konn dat Gedööns, wo faken auk aolle Backsteene van´t Müern bi wäörn, gued gebruuken un flicke daomet de Wege tüschken siene Kämpe uut.
Un de aollen Blieckbüssen (Blechdosen) de wuer´n van mi entsuorgt. De häww ick sammelt un drop waocht´t, dat de Klüngelskäärl kamm. Un wenn ick sien Tuuten haort häww, dann was he nich wiet. Dann häww´k miene Büssen tosammenlaggt un mi üöwer de paar Gröschkes freit, de ick füör dat biettken Blieck kreeg.
Düse Geschichte is ut dat Book “Dat Geld ligg op de Straot: Dönekes un Riemsels” van Helmut Holz, wat in den Westfalium-shop online te koopen is. Nu dat Book bestellen
So wuer de “Müllabfuhr” van fröher to ne´”Win-win-Situation”, äs man vandage seggen könn. De Buer konn unsern Müll gued bruuken, he har nix daofüör to betahlen, Vader aowwer auk nich füör´t Affhahlen, un ick häww mi met miene “Müllabfuhr” ´n biettken Taschkengeld verdennt. Un so wäör´n wi all´ bineen tofriär.
Speak Your Mind