Fieftig Jaohr toasamen Plattdüütsk küërn

Unner düsse Üöwerschrift stonn dat Driëppen van de suërländsken Plattküërers. Inladen hadden de „Plattduitsken Fraulüie Stockmen un Dörnholzen”, de an düssen Dag dat 50. Jaohr van iähr Bestaon fiërt häbt un mäer äs fieftig Gäst wassen kuëmmen. Düesse Jaohrdag van de Fraulüie was auk de Ursak, dat iärstmaols üöwerhaups düsse Fiër nich in’n Stertschultenhof in Cobbenrade west was. Mannige Gäst wassen kuëmmen to „Prölekes” bi Koffi un Koken. Naodem Annegret Schmidt van de „Plattduitsken Fraulüie” gröten hadde, wies Markus Hiegemann van’n Arbaidskring „Plattdeutsch” in’n Suërlänner Hemaotbund de Gäst daorup hen, wat nao de Rigenfolge passeern sall. De Vüörsitter van’n Suërlänner Hemaotbund, Dr. Karl Schneider, graleere de „Fraulüie van Stockmen un Dörnholzen” to de Jaohrdag un wies akraot sau äs Dr. Robert Damme van de LWL.-Kommission füör Tungenslag un Naomensfüörskung up dat Besunnere ant Platt in’t Suërland, Mönsterland un ännerwäggens hen.

De Plattduitsken Fraulüie Stockmen un Dörnholzen – Foto Reintke

Un äs de Küërie, de auk wull van grauten Belang was, afhaakt wüör, göng de Nummdag up gemöötlikke Wies wieder. Josef Krempel met sien Treckbüül (Akkordeonm) spiëlle plattdüütske Leeder, de sick afwesselten met Vüördriäge, Dönekes un Bidriäge uut’n Oldag. Met „Drüttken un Anton”, „Chüllene Hochteyt” un „En wahn Spektakel” suorgten elke Küërers daofüör, dat et ni nich langwilig wüör. Auk de Iärnsten un naodenklicken Texte possen guët to de Naomeddag. De fiërlikke Afsluot van den Jaohrdag was in de St. Pankratius Kiärke, wu Msgr. Dr. Konrad Schmidt tom Enne van de besunneren Fiërdag de Misse daon het.

De Besöker hadden eene schööne un kuortwilige Tiet beliäwt un daobi vöstaohn, wu lebennig dat „Platt” is – auk wan de Tungenslag in vöscheidene Giëgenden faken unnerschaidlick sien kont. „Plattduitsken Fraulüie” häbt sick met elke un vöschaidene Bidriäge afwesselt.