In Hiärm spiëllt se wiër up Platt

van Helmut Holz

Plattdüütsk Teaoter, dat was in Hiärm (Herbern) eengslik ümmer üm de Jaohreswenne Programm. Tüsken Wiehnachten un de iärsten Wiäken in’n Januar (Harremaond) häbt de Laienspiëllers viëlle Jaohre met’t plattdüütsket Teaoter de Lüe Spaos maakt. Blaus lestet Jaohr was een Päösken naidig, wieldat eener van de Spiëllers sien Beroop nich met’t Teaoter tosammenbracht hät. Dat binao färrig proowte Stück häbt se afsäggen müëten! Aower: „Wi kuemmt wiër”, häbt de Teaoterlüe vöspruoken un se häbt Waod haollen.

Met de swatte Komödie „Chaos in’t Bestattungshuus” häbt se sick düetmaol een Stücksken uutsaocht, dat Smackes (Tempo), Derk (Witz) un Üöwerraschungen metbrengt. Dat Stück vötallt de Geschichte van’t Bestattungshuus Speck, wu et siet enniger Tiet een biëtken kriebbelig was, kuert un knapp: Et faile Geld. Dat Bestattungshuus ston kuert füör de Pleite. Un äs de Ve-Upkaiper (Viehhändler) van niëbenan siene Frau loswäen wull, dao hät de Chef van’t Bestattungshuus sick met iähm tosammen een unmoraolsken Tratt uutsaocht. Aower all dat, wat de Beiden sick uutdacht hadden, göng doniëben, äs de Frau van’n Upkaiper un de Merske van’t Bestattungshuus sick unvösaiens druoppen häbt. Un äs auk nao de Suohn van Speck, uut son swattet Gothic-Drübbelken, daoto kaim, göng up eenmaol alles düörnanner . . .

Acht Spiëllers, de met Düörnanner up de Büën daofüör suorgt, dat de Lüe sick een Knüpp in’n Buuk lachen könnt: Andreas Nienhaus, Carolin Frigge, Nils Daldrup, Kai Nienhaus, Marion Kraß, Beate Feldkämper, Monika Voss und Peter Schulze Horn  – so eefach kaase de Frau nich loswiärden

Siet Hiärwstmaond (September) häbt sick de Teaoterspillers un de Hölper tweemaol in de Wiärk druoppen, üm iähre Wäöder un iähre Bewegungen up’nanner aftopassen. Dat is bie’t Teaoterspiëllen van grauten Belang. Andreas Nienhaus hät de Upsicht (Regie) üöwernuommen, he hät auk daofüör suorgt, dat de eengslik up hauchdüütsk Schriwene un van Heino Buerhoop up Platt üöwersatt’te Komödie bestgued nao Hiärm pässt.

Nao Wiehnachten gaoht se met iähr Stück up den Büëne un dat wet af de 27. Kristmaond (Dezember) büs an 10. Januar (Harremaond) sessmaol in de Profilschool van Hiärm spiëllt.