De Europamesterschop in´n Football, de düert Jaohr in Dütskland uutspiëllt wet, lait mi fieftig Jaohr trüggdenken an 1974, äs dat graute Spittakel – de Football-Weltmesterschop – in Dütskland utspiëllt wuernen was. In son grautet un wiet hen bekanntet Hotel in Askebiärg wuenden de Spiëllers uut Afrika, uut Zaire. Jeden Dag mössen se nao Siäppro (Seppenrade) hen, wo se up een Platz ächter Naundrups Hof trainieren dain.
Ick was äs Redaktör jüst bi de Tietung anfangen un mos füör de Liäser kieken und upschriewen, wat dao passede. Füör de Lüe ut´t Duorp was dat Gastspiëll wat gaas Besunneret. De Bueren un annere Lüe ut dat Kiärspel kieken sick dat all manks an, aower vöstaohn konnen se dat Gaase nich.
Trainieren, wat´n Quatsch – Bild Pixelio/ www.sonjawinzer.de
„Trainieren hät dat, wat´n Quatsch“, sägg Wilm Graute Pentrup to sienen Naober op´n Platz un küere wieder: „Bi us Bueren giw´t so wat auk nich. Entweder wi dot üöwerhaupts nicks aorre wie müet richtig henlangen. Stell di äs füör, wi wellt den Roggen aorre Weiten an´n Grund maken un vätteihn Dag vüörhier mössen wie dat trainieren . . .
Jeden Dag, wenn de Spiëllers met dat Gedöns loslaggen, to dat se Training säggt, äs Graute Pentrup gneesede, dann kreegen de Lüe dat Muulrieten. Met Gymnastik göng dat loss, dann laipen se´n paar Runnen üm den Platz un tolesst kreegen se´n Ball.
Eenen guedden Dag draps Graute Pentrup sienen Öhm uut Lünkhusen up´n Platz. De har van de Football-Weltmesterschopp nicks haort, eegentlich interessiere iähm dat auk gar nich. Aower he har´t düssen Muornen inne Tietung luosen un so wull sick dat auk äs ankieken.
„Wat makt de do?“ fraog he Wilm. „Dat sind Footballspiëllers uut Afrika“, gaww Wilm trügg. „Uut Afrika?“ wünnere sick de Öhm, „un waorüm kuemmt de nao Siäppro, könnt de an Huus nich spiëllen? Ick häb lährt, dat Afrika wüör so wahne graut, do wet se doch wull ´n Platz häbben, üm Fotball to spiëllen!“
„De sint Weltmesterschop daobi“, versök Wilm sienen Öhm uptokläören. Aower de wull dat nich vöstaohn. „Wenn de Weltmester wäenen wellt, könnt se dat nich auk in Afrika?“ Dat was so unwies, dat Wilm sick all up de Teent (Zehen) triäden mot, üm nich los to prusten. „Öhm, de wät wisse nich Weltmester, dat sind so wat äs Läerjungs in´n Football. De spiëllt met, aower gewinnen könnt de nich.“
Daomet har Wilm aower wat saggt, dat de Öhm nu üöwerhaupts nich begriepen konn. „Dan konnen se auk faots an´n Huus bliewen. Kuemmt nao Siäppro, dot nicks Anneret äs Football spiëllen un wät nich äs Weltmester. Wat´n Blödsinn“, knuerde he sick in sienen Baod un sagg dann to Wilm: „Laot us laiwer nao Huus gaohn. . . !“
Helmut Holz
Speak Your Mind