An´n eersten Sunndag in´n Oktober is dat Erntedankfest un dat fieërt se in viëlle Düörpkes nich blaoß in´t Mönsterland auk vandage nao wahne graut. Aower pässt dat üöwerhaups nao in de Tiet? Dank to säggen is gued un pässt auk alltiet, aower düert Fest?
De Korn-Ernte is auk vandage binoh datsülvige äs fröher, blaoß de Art un Wies´ hät sick düör de grauten Maschinen ännert. Jüst so äs fröher mäkt dat Wiär (Wetter), besunners de viëlle Riängen, de Buern to schaffen. Aower düsse Ernte hört up´n Buerenhof ümmer nao daoto, ofschon se met de modernen Maschinen auk nich mähr datsülvige is äs fröher.
Aower üm dat Obst, üm Äppel, Beern (Birnen), Pruumen (Pflaumen), Päschken aorre Plüschäppel (Pfirsiche) kümmert sick blaoß nao ´n paar – de Arbeet launt sick nich. Iärwten (Erbsen) un Bauhnen döppen, Kasbetten (Johannesbeeren) abstriëppeln – dat mott all´s siene Tiet häbben. Fröher dain dat up´n Buerenhof in de heele Famillge, besunners met de Omas, aower de sind vandage auk wahn knapp wuor´n …
Un vandage haolt sick de Lüe auk nich mehr dao dran, dat alls to siene Tiet up´n Dischk kümmt. Tomaten, Gröönkohl met Winterküertel (Birnen), Iesbeen (Eisbein) met Suermoos un annere Kappesarten (Kohlarten), Wuërdeln (Möhren), Schwattwuërdeln aorre Saolaot könnt de Lüe dat ganße Jaohr üöwer kaupen.
Jüst so is dat met Obst, Erdbeer´n un Wiendruuven kuemmt uut Spanien aorre Südafrika, Krisbetten (Stachelbeeren) sind auk in de heele Welt to Huus un vandage giww et met Mango, Papaya, Ananas, Avocado, Kaki, Kiwi aorre Litschi Suorten, van de usse Äöllern nie nich wat häört hadden.
Un all dat lekkere Gedööns könnt wi dat ganz Jaohr üöwer kaupen. Un daomet könn auk elken nieën Dag „Erntedank“ sien´ …
Buoben an´n Baum waocht de Appels drop, dat se plückt wäern, annere liggt all up de Äer – aower dat Obst uut de heele Welt wett met´t Audo nao de Läden henbracht
– Text und Zeichnung mit freundlicher Genehmigung des Schnell-Verlages dem Buch „Dat Geld ligg op de Straot” entnommen –
Speak Your Mind