Twiärs düör Dütskland, van Flensburg nao Oberstdorf hen, dat sint üöwer duusend Kilometers. De wull mien Swaoger in sess Dage met`n Fahrrad föëhr´n. Daomet lait he siene Gäst an sien´n dreiunsesstigsten Gebuortsdag vödattert trügg. „Dat gait nich, dat brings Du nich färrig”, häbt siene Frönde düörgaons saggt. Aower de unwise Kääl wus haorgenau wat up iähm tokam. Sien Plaon was all akkraot upstallt, de eenzelnen Dagestouren wassen in sien´n Computer fasthaollen. All siene Frönde har he inlaoden, de Tour up iähre Wies´ to Huus up´n Sofa met tomaaken. Daotao was de Computer an sien Rad up „interaktiv” installt.
Foto privat – Bericht Helmut Holz
Un dann göng et loss. Toeerst met de Isenbahn nao Flensburg hen. De Üöwernachtungen wassen üöwert Internet all bi sess Stiäden anmellt un betahlt. De eerste Nacht was wahne Kuërt un Muornens üm drei Uhr raip iähm sien Wecker uut´n Slaop un van dao an was de Sattel sien Platz. Binao diätteihn Stunden duëre de eerste Etappe van Flensburg nao Lüneburg hen. Viëll Slaop gönn he sick nich, an naichsten Dag göng et alle kuërt vüör veer Uhr wider. 227 km büs nao Göttingen stonn up de Dagesplaon.
Un de diärde Etappe har et in sick: 205 km nao Schweinfurt hen, un dao wassen viele Biärge bi. Up düsse Tour moss he auk to Foot laupen, wildatt dao son Stück tüsken was, dat de Naomen Straote nich „vödennt” har. Sao was he iärst kuërt vüör niëgen Uhr ankuëmmen.
Daomet was de Halwschaid afhaakt. Up de lessten Etappen kamm iähm dat Wiär met Riängen un baseligen Wind daotüsken. Aower auk dat konn iähm nich van de Straot blaosen un sao stonn he an´n sessten Dag akraot sao äs he dat plant har, middags in Oberstdorf an´t Ingangsschild. De Tiet was päössig füör de Rückfahrt met de Isenbahn un sao was he Medernacht wiër to Huus in Attendorn.
Wolfgang straolt nao duusend Kilometer jüst sao, äs wenn he ´ne Spritztour maakt hat
Speak Your Mind