Dao fäöllt mi Hamstern in – dat Waod giëw et üöwerhaups nich up Plattdütsk. Hamstern was nao den twedden Weltkrieg een Wäg füör de Lüe uut´t Ruhrgebiet, üm noog to iätten to häbben. To kaupen gaw et nicks in de grauten Stiäden un sau göngen viëlle in´t Mönsterland nao de Buërn tom biäddeln. Düsse Tieten aower sint all lang vüörbi.
Hamstern ist gerade wieder im Kommen – Foto Pixabay
Inkaups-Dulligkait gaw et iärstmaols wiër an de lessten Dage vüör de 21. van´n Kristmaond (Dezember) 2012. Dao was de Lüe de Kalenner van de aollen Maya infallen, nao dem de Welt an düssen Dag unnergaohn sall. Daomaols wassen de Slike (Schlangen) an de Kassen van de grauten Inkaupsläden sau lang äs nich wat. „Wenn de Welt unnergeiht . . .“ häb ick mien diärdet (drittes) Bööksken daomaols näömt.
Hamstern: Im Corona-Lockdown wurde plötzlich Toilettenpapier knapp – Foto Pixabay
Aower vüör mähr äs twee Jaohre is dat Waod Hamstern wiër frisk in Muode kuommen. Dao was et de Besuorgnis wiägen Corona un up eenmaol gaw et van een Dag up den annern keen Lokuspapeer mähr to kaupen un vandage giew et ne nieë Welle. De grieslikke Krieg tüsken Russland un de Ukraine hät all wööst graute Löcker in de Riegen van de Inkaupsläden makt. Un düëtmaol geiht´t in de Hauptsake üm Miäll un Uolig (Öl). De Lüë häbt dat in´n Fröhjaohr koft, äs wäörn se unwies. Daobi häbt viëlle siet Jaohren nich män bakt – aower et is jau guëd, dat wat daofüör in´t Schap (Schrank) is . . . Siet Mäten van düët Jaohr giew et wiër ´nen niën Grund to´t Hamstern. (hmh)
Speak Your Mind