De rächte Weg! Ick häb all üöwer sesstig Jaohr den Föhrerschien un sin büs nu sunner (ohne) Malöör un Bums üöwer dusend un mähr Straoten föhrt. Daobi häb ick in all de Tiet üöwer eene Miljaun Kilometer ächtert Stüër siätten un ick häb alltiet funnen, wat et to finnen gaw. Fröher häb ick mi met de Straotenkate beslaon (schlau) makt un de Weg in´n Kopp fasthaollen. Faken göng et daoniëben, aower ankuëmen sin ick allemaol.
Dat ännere sick, äs ick to minen siëmtigsten Gebuortsdag een Navi kriegt häb. Up de eene Siet was dat schöön, ick bruuk jao nicks anners to maken, äs den nieën technischen Kraom vüörhiër met all dat to foern, wat dat Wunnerdings wiëtten moss, üm mi met dat Audo an de rächte Stiär to brängen.
Fröher gängt ok ohne dat moderne Tüch – Plattdütske Geschichten un Riemsels van Helmut Holz
Ick most de Stiäden, de Straoten un de Huusnummern angiëben – un dann wiest mi dat Navi nich blaus de Weg, et sägt mi auk, wuviël Kilometer ick to föhren häb un wan ick daosin wüör. Un – nich to vögiëtten: Et küert mi auk to, wan dao een Blitzer an de Straotensiet staiht.
Et hät aower duërt, büs ick mi an all dacht gewüënt har. In de Tiet sunner (ohne) Navi häb ick up miene Frau haort, de konn sick altiet gued de Straoten un Ümwiäge miärken. Manksen kam iähr Tospraok up düsse Wise: „Du moss dao links harüm afbaigen“. Aower wann ick dat Blänkerlecht (Blinker) satt´t häb, sägt se faken: „ick mein de annere Straot nao links, de, de dao ächten küemt.“
Aower auk met dat nieë Navi häb ick mine Probleme. Ick glaiw altiet nich, dat dat alls püke (richtig) is, wat mi dat Deel säg. Un dann niëm ick de Straot, de mi päössiger schient. Un mine Frau sägg trächt (zu Recht): „Du moss auk op dat häör´n, wat dat Navi di sägt!“ Un dann küemt de Sprüëk ächterhiär: „Waorüm sass Du up dat Navi häöern – mi häs Du jao fröher auk nich glowt.“
Speak Your Mind