Niëgentig Jaohr alt is he düëtt Jaohr wuorden un he kann up viëlle Jaohr trüggkieken. Un dat döt Dieter Harhues all längere Tiet. “Wenn Ji üöwer 85 Jaohre aolt wuorn sind, kiekt Ji nich mähr to viëll nao vüörn, weil dao nich mähr alltoviëll to verwaochten is”, schriew he söws in sien Vüörwaort van düsset Book. “Vant Höltken up`t Stöcksken”, geiht et bi plattdütske Küërie faken un düet Motto ist auk in sien Bööksken. Up 207 Sieten hät Dieter Harhues fasthaollen, wat he in sien Liäben beliäwt hadde.
Dat geiht laos met acht Vertellsels ut siene Studententiet un dao steiht siene Heemaot met de Wiärse un Handuorp vüörnean. Bi de Vertellsels Oma Liesbeth un iähre Küëke aorre Suermoss düörneene gekuokt staonn dat Iäten up´n Plaon. Nieë Naobers un Vakanzen in Holland heet twee annere Biedriäge in dat Book, dat lesstet Jaohr all in de twedde Uplage gaohn ist. Dieter Harhues vertellt viëll van gestern, aower he kiekt auk up siene humorvulle un besunnereArt up de niemodsken Saken van vandage. “Aohne Computer geiht´t auk” schriew he in een Kapitel, aower he satt´t auk hento: “Wäss nich mähr vieëll gewahr!” Un bi “Iäten up Riäder” schriew he üöwer eene Sake, de vandage ümmer mähr an Bedütung hät. Uut de längste Geschicht´ in düet Book hät he de Titel maakt. Dao beschriew he up viëlle Sieten, wu et iähm gaohn is, äs he eenmaol bie een´n denstlicken Besök in Düsselduorp tosammenklappt was. Dat vertellt he up siene besunnere Art siene Tiet in´t Krankenhuus in usse Landeshauptstadt. Un üöwer bliew de Erfahrung, dat “Recht haben” nich ümmer gliek is met “Recht bekommen.”
Dieter Harhues: Auk´t beste Kranksien dögg nicks! Plattdütske Vertellsels ut lange Liäbensjaohre.
207 Sieten in viëlle Kapitel un ächtendran Naokieksel un Verteeknis van viëlle plattdütske Wäöder.
Agenda-Verlag Münster, ISBN 978-3-89688-749-8, 14,90 Euro
Speak Your Mind