Straoten-Gaometgröön …

Wat giwt et vandage nich all´s füör Wäöder, “Straoten-Gaometgröön”, de et eegentlik gar nich giwwen könn. Dat Waod van den „Maulwurfshaufen-Hügel-Hobel“, wat mien´n Öhm sick uutdacht har, wuor lesste Dage füör mi up den twedden Platz trüggsatt´t. Ick wull van de Stadt wiëtten, wat et kosten dai, de Griäser to schnieën, de nu längs de Straoten in de Griäben wasst un de so hauch wet, dat de Audoföhrer manks nich drüöwer kieken könnt.

Bild un Text “Straoten-Gaometgröön” – Helmut Holz

Un dao häb ick lährt, wat sick de Bürokraoten uutdacht harn. „Straßenbegleitgrün“, unner düsse Beteeknunk hät das Gräs bi us inne Stadt Togang in de Bööker funnen. Düet Waod schient mi akkraot son Humbuug (Unsinn) to sien´n äs de „Görshaup-Hüöwel“ van mien´n Öhm uut`t lesste Westfalium un et is up Platt nich ümtodreihen. Un dao häb ick mi söws holpen un dat Waod „Straoten-Gaometgröön“ druut makt.

Aower de Anwoll (Grund) daofüör, dat ick mi daomet uut´nanner satt´t har, was raineweg anners. Wann ick in´n Juni düört Mönsterland föehr, dann fäöllt mi up, dat dat Gräs an den Straotenrand un de Griäben met ne Maschien schnieën wuor, de füör´n Trecker päössig maakt wass. Un schnieën wuor ümmer män blaus viellicht ´n Meter an de Griäwen längs, daomet de Sicht up de Straoten un de Kuowen frie wet.

Ick häb bi de Stadt in Wäen fraogt, wat dat füör de Stadtkasse kosten döt. „4,5 Cent up´n Meter“ häbt se mi lesstet Jaohr Uutkunft giëwen. Dat höehrt sick nich wahne düër an, aower et riäknet sick to 45 Euro up´n Kilometer up. Dao is mi infallen, dat fröher vüör sestig aorre mähr Jaohre dat Gras an de Griäben un an Bahndamm van de Lüe söws schnieën wuornen was.

Dat hät de Stiäden nix kost, de Lüe konnt dat Hai guet füör iähre Diers äs Kanickel, Schaop, Hippen (Ziegen) un Hohner bruuken. Füör de Indeelunk van de Griäwen was de „Straotenmester“ tostännig un de hät de Griäben nao Meters vögiëwen un daofüör faken een Pülleken Klaoren aorre auk Tabak kriëgen, wenn he et met dat miäten nich so gaas akkraot niëmen dai . . .