Dat nieë Book

Dat nieë Book “Platt för alle Dage” is raus.

De Tiddel van´t Book is päössig: Platt för alle Dage un alle Geliägenhaiten häbt Heinz Lenkerhoff un Josef Vasthoff fasthaollen – Foto Agenda Verlag

De Tiddel van´t Book is päössig: Platt för alle Dage un alle Geliägenhaiten häbt Heinz Lenkerhoff un Josef Vasthoff fasthaollen. Tovüörderst makt se düüdlick, dat düet Bööksken ne Hölpe sien sall, üm ne Muul vull Platt to küeren. Met de Uutspraok gait et loss un up de knibbeliggen (schwierigen) Wäöde wiest Hannes Demming met sien schönet Riemsel „Moot maken” hen. Dao sägg he auk, wat füör´t Küeren in alle Spraoken van Belang is: „Maak´t Muul laoß! Dat is´ A un O. Met Moot vüöran! Nu küer! Män to! Dann gait et wider met`t Dagestiet säggen van „gueden Muorn” büs hen to „Guede Nacht” un „schlaop gued!” Ächterhiär läers wat üöwer Di un annere Lüe to vötellen.

Dat nieë Book – Foto Agenda Verlag

Up de Sieten „Iäten un Drinken hollt Lief un Siäl bineen” kuemt all de lekkeren Mönsterlänner Saken äs Braoden, Wuorst-, Liäwer- aorre Möpkesbraut jüst sau up´n Disk äs Iärwtensupp, Düörgemöös, Kooken, Swattbraut un all dat Obst, van Appels üöwer Biärnen, Kiärssen un Prumen. Bi „De beste Krankheit döch nich” steiht wat üöwer Koppien, Tannpien un Buukpien büs hen to Hiärtklabastern drin.  Arbaid, Huus un Gaorn, Geld un Wiär – üöwer vandage, muornen un gistern geiht´t hen to de Dage, Jaohrestieten un Fiërdage.

Plattdütske Wäöde van´n Apenköster büs Wiesepinn häbt de Autoren upschriewen un düüdlick makt, dat viëlle Wäöde uut´t Französke un uut´t Latinske kuemt. Dönekes un Riemsels van Plattdütske Dichter äs Augustin Wibbelt un Hannes Demming un elke Dönkes laot de Liäser gnöcheln, gnesen un manks wull auk glapken. Met Leeder uut Westfaolen geiht de plattdütske Lährstunne in düet Book to Enne – un se hät Spaß makt.  hmh

Heinz Lenkerhoff & Josef Vasthoff: “Platt för alle Dage”. 122 Sieten, Agenda-Verlag, ISBN 978-3-89688-690-3, 14,90 Euro