„100 Jaohre Schlager in Gronau“ un mihr

Print Friendly, PDF & Email

100 Jaohre Schlager in Gronau

„100 Jahre Deutscher Schlager!“ So lutt de Uutstellung, in de vanaff 16. Mai bis hen to’n 17. September in’t „rock’n’popmuseum“ Gronau „Musik drin“ is. Aowwer nich blaoß de Leeder uut de „goldenen Twintiger“ aorre van´t Wirtschaftswunder – auk de Revivals un de Schlager van´n Ballermann hört daobi. Niëben de Leedkes sind auk Saken van de aollen aorre nieën Stars (u. a. Zarah Leander, Tom Astor, Helene Fischer, Jürgen Drews) to bekieken. „Der Schlager ist auch ein Stück Kulturgeschichte!“ Dat well de Uutstellung düetlick maken. We Lust hätt op mehr, de is bi www.rock-popmuseum.de an de rechte Adresse.

IMG_3112

Foto: rock’n’popmuseum

Radsportler uut Dütschland driäppt sick in Wäen’

Dat Städtken Wäen’ (Werne) hätt Grautet vüör: Van 27. Juli bis to’n 2. August driäppt sick Radsportler uut ganz Dütschland to iähr „Bundes-Radsport-Treffen“ van de Touren- un Freizeit-Fahrer. Organiseert hätt dat Driäppen der Bund Deutscher Radfahrer. An de Christopherus-Kiärk in´t Zentrum van de Stadt met iähre 30 000 Inwüöhners geiht´ laoss met de Touren. Daobi könnt de Sportler eene Wiärke lang de Pättkes un Wegge rund üm dat Städtken an de Lippe affstrampeln. Un Wäen’ hätt auk ne heele Masse mehr to beden. We interessert an dat Gedöns rund üm‘ dat Driäppen is, de kann bi’t Stadtmarketing Werne (02389/534080) fraogen aorre üöwer’t Internet bi www.werne-marketing.de.

Schwimmen un Singen bis Middernacht

Water, Musik un Danz – düesse drei Saken driäppt sick an’n 19. Juli in Detten (Emsdetten). „Middernachtsschwimmen“ näömt sick dat, wat an düessen Dag in’t Waldfreibad passeern sall. Tim Töpfer, Jürgen Milski un Victoria Kern äs Double (Naomaker) van Schlagerstar Helene Fischer staoht an düssen Aobend op de Bühne van’t Schwimmbad. De Düören gaoht üm 19:30 Uhr laoss, ne halwe Stunn’ läter sall dat Programm anfangen. Bis Middernacht könnt de Lüe schwimmen un sick nao de Danzerie, da auk daoto hört, ’n biëttken affköhlen. We mehr wiëtten well, kann sick bi kloppenborg@stadtwerke-emsdetten.de mellen.

De Traber kuemmt wiër nao Stewwert hen

Eenmaol in’t Jaohr, düett Jaohr is et an’n 17. August, sind de Traber in Stewwert (Drensteinfurt) to Gast. Dann kuemmt ne heele Masse an Piärde un Sulky-Driewer op Inlaodung van den Rennverein, üm de Tradition oprecht to haollen. De Verein is 1911 uut ’ne Wette van 15 Lüe entstaohn un siet düesse Tied giww et Trabrennen op de 850 Meter lange Grasbahn, de immer gued in Schuss haollen wett. Lesstet Jaohr wäör´n üöwer 6.000 Tokiekers op de Bahn. Elf Rennen gaww et un düör de Kassen laipen 86 282 Euro. Düett Jaohr sallt twiälw Rennen op’n Plaan staohn un auk van de besten Sulky-Driewers sind etlicke daobi. Uutkünfte giww et bi´n Vüörsitter Klaus Storck, Telefon 02508/8746.

 

 


 

Deine Meinung ist uns wichtig

*